Korçë – Qytetarët Kundërshtojnë Rritjen e Çmimit të Biletës së Transportit Publik

Rritja e çmimit të biletës së transportit publik dhe koha më e gjatë e pritjes në stacione ka shkaktuar reagime të shumta nga qytetarët e Korçës. Ata shprehen të pakënaqur me këtë ndryshim, duke e cilësuar si një barrë shtesë për xhepat e tyre në një kohë kur kostoja e jetesës po rritet.

“Çmimi është bërë i papërballueshëm për shumë nga ne. Për më tepër, autobusët vonohen dhe kjo na krijon vështirësi në përditshmërinë tonë,” shprehet një qytetar.

Nga ana tjetër, Bashkia e Korçës ka sqaruar se rritja e çmimit është në përputhje me tarifat e vendosura edhe në qytete të tjera të vendit dhe synon të mbështesë përmirësimin e shërbimit të transportit publik.

Pavarësisht kësaj, qytetarët kërkojnë më shumë transparencë dhe përmirësime në cilësinë e shërbimit për ta justifikuar këtë rritje çmimi.