Qyteti i Korçës njihet për atmosferën e veçantë që krijon çdo fundivit me dekorin festiv dhe aktivitetet e shumta, duke tërhequr vëmendjen e shumë vizitorëve që zgjedhin të festojnë Krishtlindjen dhe Vitin e Ri në qytetin juglindor.
Këtë vit vendosja e dekorit ka nisur më herët, duke premtuar që qyteti i festave do të jetë edhe më i bukur. Prej disa ditësh punonjësit e ndërmarrjes së shërbimeve publike kanë nisur punën për vendosjen e zbukurimeve për t’i dhënë Korçës një atmosferë festive.
Aktualisht është duke u punuar për vendosjen e dritave zbukuruese në zonën këmbësore, tek Pazari i Vjetër si dhe tek bulevardet dhe sheshet kryesore, teksa puna është vijon edhe në qendër të qytetit tek sheshi përpara katedrales, ku përqëndrohet vëmendja e të gjithëve.
Në dekorin e këtij viti nuk do të mungojë bredhi i zbukuruar, por edhe këndi i lojërave për fëmijët, që do të gjallërojë qendrën e qytetit.
Burime pranë bashkisë Korçë bëjnë të ditur se edhe këtë fundvit do të ketë një kalendar të pasur me aktivitete kulturore artistike që do të zhvillohen gjatë gjithë muajin dhjetor.
