Korçë – Mbetje mishi të skaduar hidhen në pyllin e Roshanjit, denoncohet ndotja nga një Fast-food

Roshanj, Vithkuq – Një banor i fshatit Roshanj, që i përket njësisë administrative Vithkuq, ka ngritur një denoncim serioz për ndotje mjedisore të qëllimshme. Sipas tij, prej tre ditësh, një prej fast-foodeve të qytetit të Korçës ka shkarkuar mbetjet ushqimore dhe mishin e skaduar në zonën pyjore të fshatit.

“Një erë e padurueshme ka filluar të ndjehet në pyll. Po dëmtohet ambienti, po rrezikohen kafshët e egra dhe shëndeti ynë,” – ka deklaruar banori, duke kërkuar ndërhyrje të menjëhershme nga Policia dhe Autoriteti Kombëtar i Ushqimit (AKU).

Sipas tij, kjo situatë është e re dhe ka ndodhur vetëm në tre ditët e fundit. Ai thotë se më herët nuk ka pasur raste të tilla në këtë zonë të pastër dhe të frekuentuar shpesh edhe nga vizitorë.

Ky nuk është rasti i parë kur subjekte ushqimore nga Korça akuzohen për hedhjen e mishit tëm skaduar dhe mbetjeve të tjera në ambiente publike, çka përbën jo vetëm shkelje të ligjit, por edhe rrezik për mjedisin dhe shëndetin publik.