Fshati Lin, i njohur për bukuritë e tij natyrore dhe kohët e fundit për t’u kthyer në një atraksion turistik, po përballet me një problem të madh mjedisor. Mungesa e rrjetëzimit të ujërave të zeza prej vitesh ka sjellë pasoja serioze për mjedisin dhe për cilësinë e jetës së banorëve.

Ujërat e zeza që dalin nga shtëpitë derdhen në një kanal të hapur, i cili përfundon direkt në liqen, duke shkaktuar ndotje të madhe. Përveç ndotjes, ky kanal është kthyer në një grumbull inertesh dhe mbeturinash, ndërsa aroma e rëndë e tij është një shqetësim i vazhdueshëm për banorët.

Banorët theksojnë se, pavarësisht se Lin po tërheq gjithnjë e më shumë turistë, ky problem po prish imazhin e fshatit dhe po ndikon negativisht tek ata që vizitojnë zonën. Ata i bëjnë thirrje institucioneve lokale që të marrin masa për të ndërtuar një rrjet kanalizimesh dhe të pastrojnë kanalin ekzistues.