Me dhimbje mësuam lajmin e hidhur se ka ndërruar jetë akademiku z.Kopi Kyçyku “Nderi i Qarkut Korçë”.
Akademik, inxhinier, historian, shkrimtar, gazetar dhe përkthyes, Kopi Kyçyku ka lindur në Pogradec më 30 qershor 1943, studimet i kreu në Universitetin Shtetëror të Tiranës pranë Fakulteteve Gjeologji-Miniera.
Ka pasur funksione të ndryshme në administratën lokale, në radiotelevizion, Ministrinë e Punëve të Jashtme dhe në Akademinë e Shkencave të Shqipërisë. Është autor i një numri vëllimesh kryesisht poetike, satirike, monografish historike dhe esesh.

Ka përkthyer nga gjuhë të huaja në shqip dhe anasjelltas mjaft vepra të rëndësishme të letërsisë e të kulturës botërore. Është anëtar i disa organizatave shkencore ndërkombëtare. Qysh nga viti 1998 është bashkëthemelues dhe bashkëdrejtues i Revistës Evropiane “Haemus” dhe Kryetar i Shoqatës Kulturore Shqiptare me të njëjtin emër.
Për kontributin e tij në vitin 2019 , Këshilli i Qarkut Korçë i dha titullin “Nderi i Qarkut”.
Ngushëllime familjes për ndarjen nga jeta të njeriut të dashur, i paharruar kujtimi i tij!