Mjegulla e dendur vështirëson qarkullimin në aksin Zemblak – Goricë

Aksi rrugor Zemblak – Pika e Kalimit Kufitar të Goricës ka qenë i mbuluar nga mjegulla gjatë pjesës më të madhe të ditës së sotme. Situata më problematike është regjistruar në segmentin Pustec – Goricë e Vogël, ku fushëpamja për drejtuesit e mjeteve ka qenë e kufizuar, duke detyruar automjetet të lëvizin me shpejtësi të ulët dhe në numër më të reduktuar.

Policia e Qarkullimit Rrugor ka apeluar për kujdes maksimal nga drejtuesit e mjeteve, duke theksuar rëndësinë e respektimit të rregullave të qarkullimit në kushte atmosferike të vështira. Ndër rekomandimet kryesore është përdorimi i fenerëve të mjegullës, si një masë për të shmangur aksidentet e mundshme.

Drejtuesit e mjeteve këshillohen të tregojnë vigjilencë dhe të respektojnë distancën e sigurisë gjatë qarkullimit në këtë segment rrugor, i cili për shkak të mjegullës së dendur paraqet rrezik për incidente.