Shoqata e Peshkimit në bashkëpunim me institucionet përkatëse ka intensifikuar kontrollet gjatë muajit dhjetor për të parandaluar peshkimin në sezonin e ndaluar. Sipas Martin Jaçellit, menaxher i Peshkimit në Pogradec, gjatë këtyre kontrolleve janë konstatuar shkelje nga peshkatarë të cilët kanë ushtruar aktivitetin në kundërshtim me rregullat.

Jaçelli bëri me dije se janë sekuestruar rreth 6000-6500 metra rrjetë peshkimi dhe janë bllokuar mjete si varka që janë përdorur në mënyrë të paligjshme.

Nga ana tjetër, që prej fillimit të muajit janar ka nisur procesi i grumbullimit të vezëve të koranit, një aktivitet që ndihmon në ruajtjen dhe shtimin e popullatës së kësaj specieje të veçantë. Deri më tani, janë grumbulluar rreth 30 kilogramë vezë korani, të cilat do të përdoren për riprodhim në liqenin e Pogradecit.

Autoritetet apelojnë për respektimin e rregullave të peshkimit, duke theksuar rëndësinë e ruajtjes së ekosistemit të liqenit dhe mbrojtjes së specieve të tij të veçanta, si korani.