Kolonia Ndërkombëtare e Piktorëve “Ditët e Mios,” e cila zhvillohet çdo vit në qytetin e Korçës, është kthyer në një pikë të rëndësishme takimi për artistë nga mbarë rajoni dhe më gjerë. Emri i kësaj kolonie, një homazh për piktorin e njohur shqiptar Vangjush Mio, tërheq çdo vit piktorë të njohur që dëshirojnë të krijojnë dhe të ndajnë eksperiencat e tyre artistike me të tjerë në këtë qytet të pasur me histori dhe kulturë.

Në kuadër të këtij aktiviteti, intervistuan dy prej piktorëve pjesmarres ne “Ditet e Mios”,Sabri Behramajn nga Kosova dhe Agron Ujkashin nga Mali i Zi.

Për Behramajn, i cili shquhet për stilin e tij ekspresiv, “Ditët e Mios” ofrojnë një mundësi të jashtëzakonshme për të kapur në piktura peizazhet e veçanta të Korçës dhe për të krijuar një dialog të gjallë me artistët e tjerë pjesëmarrës. “Kjo është një përvojë unike, jo vetëm për pikturën, por edhe për të kuptuar më mirë pasurinë kulturore që sjellin artistët e rajonit”

Agron Ujkashi, një tjetër emër i njohur nga Mali i Zi, u shpreh se frymëzimi që gjen në qytetin e Korçës është i pazëvendësueshëm. “Korça ka një energji dhe një dritë që e bën çdo punim të duket i veçantë,” tha Ujkashi, duke theksuar rëndësinë e këtyre ngjarjeve për krijimin e një bashkësie të fuqishme mes artistëve të vendeve të ndryshme të Ballkanit.

Sotiraq Filo, kryetari i Bashkisë së Korçës, theksoi rëndësinë e këtij aktiviteti për qytetin. “Kolonia ‘Ditët e Mios’ është tashmë një simbol i rëndësishëm i kulturës sonë dhe i mikpritjes së qytetit të Korçës për artistët nga rajoni dhe bota. Kjo koloni promovon jo vetëm artin e vërtetë, por edhe lidhjet mes popujve të ndryshëm që bashkohen në frymën e krijimtarisë dhe të miqësisë,” u shpreh Filo.

Kolonia “Ditët e Mios” vazhdon të jetë një aktivitet i rëndësishëm jo vetëm për piktorët, por edhe për komunitetin korçar dhe turistët që vijnë të shijojnë një spektakël unik artistik, duke përforcuar rolin e qytetit si një nga qendrat më të rëndësishme të kulturës dhe artit në Shqipëri dhe rajon.