Nxënësit e gjimnazit “Muharrem Çollaku”, së bashku me mësuesen e tyre Mirela, kanë ndërmarrë një nismë të veçantë për festat e fundvitit, duke dhuruar lodra dhe dhurata për fëmijët e kopshtit “Drita e Dijes” në fshatin Rrëmenj. Kjo iniciativë ka sjellë gëzim dhe atmosferë festive për të gjithë të pranishmit, duke u shndërruar tashmë në një traditë të përvitshme.

Edukatorja e kopshtit, Alma Maçolli, shprehu mirënjohjen për këtë gjest bujar dhe inkurajoi bashkëpunime të tjera të ngjashme në të ardhmen.

Llazari, një nxënës i cili ishte veshur si Babagjyshi i Vitit të Ri, theksoi rëndësinë e këtij projekti dhe ftoi të gjithë komunitetin të kontribuojnë në nisma të ngjashme.

Ndërkohë, nxënësja Stelina Jaupi u shpreh se të gjithë bashkëmoshatarët e saj ndjejnë kënaqësi dhe lumturi kur japin kontributin e tyre për këto aktivitete.

Me këtë nismë nxënësit e gjimnazit Muharrem Çollaku japin mesazhin se solidariteti dhe dhurimi janë vlera që duhet të kultivohen gjithmonë.